Blogg

Snemma beygist krókurinn

Að læra snemma að leggja til hliðar held ég að sé ómetanlegur lærdómur. Ekki allir hafa það í sér að spara og stundum bjóða hvorki uppeldi né aðstæður uppá að það sé sjálfgefið að kunna það. Ef börnum er gefið tækifæri til að upplifa að það, að safna fyrir hlutum sé alltaf möguleiki, þá læra þau a.m.k. tvennt; að verða þolinmóðir neytendur og gildi þess að eyða ekki öllu jafnóðum – heldur eiga eitthvað í handraðanum. Þolinmóður neytandi hugsar sig tvisvar um áður en hann stekkur inní búð og eyðir laununum sínum.

Þessi blöð sem ég útbjó fyrir börnin glæða vonandi áhugann hjá þeim á að spara – að sjá sparnaðinn vaxa myndrænt er hvetjandi að gera enn betur. Fjársjóðsblaðið er hugsað sem hugmyndabanki fyrir þau til að afla tekna :)

Bestu kveðjur og njótið með börnunum ykkar, Amma-Dútta

 

 

Read more

Vísir að vori – og þá fæðast nýjar Nafnamyndir



Nú hef ég búið til útgáfur af Nafnamyndunum sem ætlaðar eru fyrir … við skulum segja eldri en ungabörn. Ég gat ómögulega sæst á eitt ákveðið útlit – svo þetta endaði í sex seríum! Þær eru hver með sínu sniði; sumar mjúkar, aðrar litsterkar, einhverjar léttar og aðrar eitthvað annað. Fjölbreyttar eins og lífið sjálft og mannfólkið. Engar tvær myndir verða nákvæmlega eins því útlitið fer eftir stöfum og texta.

Eitt af því mikilvægasta í lífi hverrar manneskju er nafnið hennar. Það sem mér finnst skemmtilegast við mörg nöfnin er uppruni þeirra og hvað þau merkja, þegar sú vitneskja er til staðar. 

Myndirnar verða afhentar í ramma og textann þarf að senda á gustath@simnet.is.

Kveðja, Amma-Dútta
Read more
Að aga sig til að gera sem mest úr óákjósanlegum aðstæðum

Að aga sig til að gera sem mest úr óákjósanlegum aðstæðum

Er það ekki skrýtið hvað „svona rólegheit“ varpa ljósi á marga hluti? Ég hef núna nægan tíma til að taka til, þrífa, skipuleggja, teikna og vinna í Ömmu-Dúttu sem ég setti af stað í mars – frábær tímasetning! EN ég hef komist að því, að til þess að ég nýti klukkustundirnar af einhverju viti, þarf ég stundaskrá. Ég er bara eins og börnin – þarf greinilega aðhald. Annars reikar hugurinn á milli allra þeirra verkefna sem ég „gæti“ verið að vinna í – en er ekki að gera. Um leið og ég er búin að setja upp einhvers konar skipulag, stundatöflu eða dagskrá verður mér miklu meira úr verki. 

Undanfarið hef ég verið að tileinka mér aðferð varðandi fjármálin, já ég fæ alltaf einhverjar dellur :) Fyrir ekki löngu síðan var Marie Kondo uppáhaldið mitt og ennþá, eftir heilt ár, er fataskápurinn eins og stílisti hafi lagað hann til fyrir myndatöku :) svo það virkaði.
Maður þarf ekki að verða heilaþveginn þó maður tileinki sér einhverjar aðferðir – eða jafnvel hluta af aðferðum. Taka það sem hentar og sleppa hinu.

Já, það sem ég ætlaði að segja … Þessi aðferð varðandi heimilisbókhaldið finnst mér frábær og aprílmánuður verður annar heili mánuðurinn þar sem ég nota hana. Það sem er skemmtilegast er þetta:

1. Maður handskrifar alla hluti og þ.a.l. er þetta smá hugleiðsla – þú rumpar ekki hlutunum af, þú gerir þetta fallegt. Efnið frá henni er mjög litríkt og maður notar mikið af áherslupennum – sem gerir þetta líflegt.
2. Þegar maður fær útborgað (eða reikn. borgaðan) gerir maður áætlun fyrir þá upphæð (í hvað á að nota peningana?)
3. Ef maður gerir þetta rétt veit maður nákvæmlega í hvað hver EINASTA króna fór og hvaðan hún kom. 
4. Maður gerir áætlun fyrir næsta mánuð – eða fleiri en einn. Að vísu ansi erfitt núna í augnablikinu vegna þessa ástands en ekkert varir að eilífu.
5. Maður notar ekki kreditkort (nema fyrir færslur sem koma sjálfkrafa).
6. Maður notar ekki debetkort (nema fyrir reikninga sem koma í heimabankann).
7. Maður notar bara peninga fyrir daglega eyðslu.
8. Þetta er auðvitað ætlað fyrir bandarískt umhverfi en þetta virkar fyrir alla aðra líka.

Þessi kona er með vefsíðuna www.thebudgetmom.com og hún er mjög virk á öllum vígstöðvum (Instagram, Youtube o.s.fr.v). Sumt er dálítið hmm … væmið og dramatískt EN það sem máli skiptir er það sem hún kennir varðandi heimilisbókhaldið. Mæli með því að kíkja á efnið hennar. Óþarfi að fara að kaupa af henni strax – fullt af ókeypis hlutum sem hægt er að byrja á og skoða, það þarf bara að skrá sig á email-listann. Kannski er ég ofur-skipulögð (á milli þess sem ég dett í óskipulag). Núna er ég t.d. búin að græja lista yfir hvað er í frystiskápum og -skúffum, annan yfir hvaða þurr- og bökunarvörur eru til  o.s.frv. :D

Jahá, þetta varð nú dálítið langt í þetta sinnið. En hafa ekki allar nægan tíma til að lesa núna? :)

Kærar spritt- og þvottakveðjur, Amma Dútta
Read more

Nú er hægt að greiða með greiðslukortum



Jæja, þetta eru skrýtnir tímar svo ekki sé meira sagt. Það er ekkert erfitt fyrir fólk að verða dapurt og leitt við svonar aðstæður. 
Þá er gott að draga upp jákvæðnina, ef hún er þá ekki nú þegar uppi á borðum, og muna að allt tekur enda – líka erfiðleikar af öllu tagi. Eftir stendur maður yfirleitt keikari en áður eða a.m.k. reynslunni ríkari og með einhvers konar lærdóm í farteskinu.

Amma-Dútta er a.m.k. hvergi bangin (nema smá við veiruna!) og tilkynnir hér með að núna er hægt að greiða með debet- og kreditkortum á vefnum.

Kærar spritt- og þvottakveðjur til ykkar allra, 
Amma-Dútta

Read more